事隔12年，中國女排唔單止重奪奧運金牌，仲升返上世界排名第一！根據國際排聯嘅最新公佈，中國靠喺里奧奪金嘅成績，以328分壓過305分嘅美國，自2004年九月後再次升上女排世界排名第一位。至於里奧拎銀牌嘅塞爾維亞，就喺美國後面排第三，而巴西同俄羅斯就分別排第四同五。
郎平去澳門最想「濕平」
中國女排前日隨奧運精英代表團離開香港，搭船過澳門，噚日就跟大隊遊覽各個景點，去大三巴影吓相，之後又參觀澳門博物館。女排教練郎平就最受歡迎，好多圍觀嘅市民都離到好遠咁嗌佢個名。講真吖，郎平呢半年真係投入晒喺隊波入面，佢經過澳門嘅賭場同商場之後，都忍唔住喺微博度話自己已經半年都冇行過商場，呢次一定要去行吓。至於女排主攻手朱婷就話自己第四次嚟澳門，好鍾意呢度緩慢嘅生活節奏，仲會搵機會嘆吓奶茶喎。