乜嘢叫做「妹仔大過主人婆」？睇吓比利時國家隊日前嘅操練就知道嘞！事緣呢課係比利時新任國家隊教練馬天尼斯同埋助教亨利首課帶領操練，不過無論係傳媒抑或「歐洲紅魔鬼」球員嘅焦點，都全部落喺阿仙奴名宿兼前法國射手亨利嘅身上。
喺場邊嘅攝記有幾十碌「大炮」對準亨利，捕捉佢領軍嘅一舉一動之餘，就連比利時前鋒巴舒亞伊亦將自己聽住亨利講解嘅相上載到twitter，而且寫住：「我連聽父母嘅訓示，都未試過咁留心。」對於俾亨利搶晒鏡，本來應該係主角嘅新帥馬天尼斯就話好理解，佢話：「亨利咁受注目係正常嘅，因為佢本身係一流球員，而且比賽經驗豐富，喺球場上嘅成就又高。亨利可以教到麾下球員好多嘢，為球隊作出好多貢獻。」