品味嘅嘢我求大俠識條鐵咩，好似法國貴為世界時裝大國，國腳嘅衣着品味應該有番咁上下，不過周二佢哋返到清泉練習基地報到，各位球星都以一身便服示人，阿仙奴前鋒基奧特就叫正常，一件Extreme Knockout Tee配爛牛、懶佬鞋，都叫有啲型佬味；相反曼聯中場保羅普巴，就繼續時裝災難本色，好地地上身着件仿皮褸，仲有一件連帽衞衣，都叫型型地，不過下身就配條藍黃色籃球褲，真係唔知佢想點。另一個曼聯球星安東尼馬迪爾，衣着冇咩問題，但拎個LV大袋，就強國大媽咗啲囉。
最出事應該係韋斯咸中場皮耶，成身着上Philipp Plein嘅品牌灰色套裝，但運動型唔似運動，時尚型又唔似時尚，好似着咗國旗上身。香港嗰位掌門人再開電視遊戲節目，皮耶着呢件衫去參加就fit晒。