大型補習社賣點是甚麼?摘星名師、貼題精準?其實最重要係賣「權威」,即係你唔補我,唔使旨意考得好的恐懼感,讓學生覺得人補我唔補會好蝕,策略就成功了。
最近有間sell小班教學的新派補習社開幕,創辦人竟然是高𥧌期一周要教過萬學生、前英皇中文科名師吳賢德(Arthur Kho)。「我只教到一班,其餘六十班係影片班,試問呢種形式點樣教好學生?有時名師為咗令學生繼續補習,會將件事神化,講到你一定要繼續落去,否則你就死梗,令到學生好似宗教形式咁跟落去,我哋唔需要嚇啲學生。」他深感大班教學根本照顧唔到學生需要,加上改學制對學生的批判思考要求更高,大型補習社單向的教育方法不合時宜,於是創立主張互動小班教學的「9010 Academy」。
到達補習社,首先看到的是cafe的水吧位置,原來補習社設有自修空間,上課後同學可以在這裏飲住咖啡溫書。拾級而上,走到空間偌大的補習空間,工業風裝修望落真係唔似補習社。Arthur說:「輕鬆嘅氣氛,年輕人喜歡嘅裝修風格,就係為咗唔似學校。佢哋朝早已經被困喺學校上堂,接受單向式教育,如果放學後又去補習社,又係困喺嗰種空間,有邊個鍾意?」這裏不似一般大型補習社限死課程內容,學生可在他們網站預約合適導師主攻自己的弱項,而且越多朋友一起補習,費用就攤分得越平,小班制當然比大型補習社貴,值唔值就要由家長判斷。
這間新派補習社的出現,也源於一個問功課app「Snapask」,同學拍下不懂的題目,上傳就有導師解答。創辦人余佑謙(Timothy)謂:「學生問問題後,好多時都會問我哋線下有無老師可以開班授課。」於是補習社就與此app合作,報讀課程的學生可以申請為會員,享用Snapask的online問功課服務,真人對拆又得,online即時問又得。
這種新型補習社,將來可否打破補習名師的神話呢?
9010 ACADEMY
補習費:$1,980/4堂(每堂兩小時),每班最多6人,多人同報有學費回贈
查詢: http://9010.io
記者:葉青霞
攝影:劉永發