港足聽晚喺旺角場友賽柬埔寨，對手排名雖然低過香港，但教練金判坤講明要贏波，為嚟緊東亞足球錦標賽同亞洲盃外圍賽做準備；球員收到柯打當然要拼盡，當中盧均宜就更加要落力，因為呢位傑志隊長啱啱宣佈太太又有喜，佢希望踢場好波，吸引更多球迷關注港足，對球巿起刺激作用，將來奶粉錢都易賺啲。
再造人屬計劃之內
前日開操嘅港足，噚日入咗酒店集宿備戰，之後拉隊去晒草灣操練；聽晚要評述呢場友賽嘅nowTV評述員兼足總五人足球經理曾偉忠，就專登去球場睇操練做定功課，我求大俠當然都要贒吓教練金判坤出咩人，仲要恭喜均宜將會榮升第二任爸爸。
均宜同靚靚太太Canmy前晚喺fb宣佈喜訊，太太多謝上天突如其來嘅禮物，不過今胎特別辛苦，成日作嘔，手軟腳軟兼眼瞓，食嘢都冇嚟味道。雖然有咗兩個月，但個肚就好似人哋五個月咁大。佢話幾辛苦都唔緊要，最重要平安出世。佢仲話兩歲幾嘅囡囡沚妮，答應會幫BB沖涼同餵奶，真係生性。均宜收操後話生多個係計劃之中，主要係希望沚妮快啲有個伴，至於仔女都冇所謂，最緊要健健康康。
雖然均宜近年喺傑志表現好穩定，亦係港足常客，不過就唔係成日有正選，因為金帥唔多鍾意用佢踢右閘，反而成日擺佢喺中場。港足中場競爭大，要爭到個正選位唔容易。港足友賽實力唔強嘅柬埔寨，估計會踢兩個進攻中場；金帥就話，均宜係佢其中一個考慮會用嘅八號位球員。
金帥佈陣慎防反擊
金帥強調唔好睇輕柬埔寨，因為佢哋近年贏過新加坡同中華台北，反擊速度好快，但有信心可以防反擊。另外，喺天津權健上陣機會唔多嘅基藍馬，預料有正選，其他攻守組合要睇埋今日操練後決定。柬埔寨大軍前日已到港，噚日喺將軍澳運動場操練。
除咗柬埔寨，港足下周二友賽土庫曼場波落實取消，足總噚日公佈各項退票安排，買咗飛嘅球迷今日開始辦理退票手續；由於少咗場波，港足決定聽晚賽後，全部球員可回歸所屬球會，到下月初先再集合，準備10月作客柬埔寨同主場對新加坡兩場友賽。