較高層次的麻煩，令立會候選人喊住退選。若然這個層次的黑手手臂再延伸，向選民那邊揮棍怎辦。今屆立會是雨傘運動後的選舉，也是特首選戰最可靠的民意指標，那個「較高層次」，無理由齋向一個贏面唔算高的候選人威嚇，選民幾百萬，人人自危喎。是以，一哥的警力七千，極大機會唔夠使，曾經在龍和道把佔領者扑到頭頂開花的速龍隊又要出動，威武示警：再唔收手，即刻開槍！咦，到底叫邊個收手先？萬一選民在票站前爆喊說唔敢投票，驚保護唔到老人院的家人，咪死火！選管會點可以坐視呢，奧運金主旋風已過，市民從金牌夢回歸票箱。自己兩票，投俾有使命感的年輕人，會不會被四川哥盯上？票站滿佈線眼，選舉主任極為可疑，秘撈幫西環做卧底，忽然埋身大叫「我唔信納」，閣下的選票，會當堂被廢嗎？
頂住麻煩、不信納的陰霾去投票的選民，無論自覺是左膠抑或勇武，毋忘初衷，這幾天關閉fb，隔絕惡毒狗吠留言。乜主乜師跳上大台發功，「劇團」開始交戲做嘢了。平叔心水那四位候選人，撐得住嗎？選民開遮！幫拖加油！