「商品大王」羅傑斯果然係「眼光獨到」。羅傑斯日前接受Real Vision TV訪問時話，北韓𠵱家就似係1981年嘅中國，正如中國1978年對外開放，北韓正處於開放嘅臨界點，呢一刻係絕佳嘅投資機會，如果大家家陣投資北韓圜，終有一日會發達㖭呀。
佢指，北韓已經有15個自由貿易區，去到北韓可以踩單車四圍遊覽，北韓已經唔係大家想像中咁樣。中國同俄羅斯嘅投資者已經湧晒去北韓，有一間中資集團喺北韓開銀行，佢原本諗住投資呢個集團，但律師話，由於法律問題，佢先至唔可以投資咋。
講起北韓圜，由於北韓實行「鎖國」政策，北韓圜唔流通，除咗黑市渠道，大家可以喺eBay同淘寶買到，不過數量有限。根據北韓法例，外國人喺北韓只可以用人民幣、歐元同美元購物，只有北韓人先可以用北韓圜。羅傑斯呢一刻揸北韓圜，真係得個「望」字。
除咗北韓，羅傑斯過去亦有唔少大膽投資，例如佢喺津巴布韋都有投資。另外，他亦考慮投資哈薩克斯坦同盧旺達，果然係藝高人膽大。