雖則係建制陣營今屆力捧新星，但喺新東出戰嘅新民黨容海恩似乎未有好好準備，之前多個論壇，大家已經見到呢位大律師辯才唔算好；噚日喺港台選舉論壇，佢再次令人「刮目相看」。
事緣人力陳志全問容海恩點睇增設陸路離境稅以解決水貨客問題，容海恩反問：「加稅咪即係要再畀多啲稅？我哋香港人……」陳志全插嘴話「非本地居民啊，容小姐」，容海恩即反問：「咁你咁樣又可以控制到？咁飛嗰啲呢？陸路呀？淨係陸路呀？咁飛嗰啲你又唔控制嘞喎？」飛嗰啲？講緊陸路喎？似乎答非所問，難怪慢必質疑：「走水貨係飛住走，定火車走啊？」
唔知係咪唔識答，容海恩繼而指慢必叠聲，「你要叠聲定我要講呢？」慢必一語道破箇中玄機：「你冇答過我問題啊！」該區其他參選名單，請參閱本報立會選戰網站 http://hk.apple.nextmedia.com/legco2016/region 。