林作早排背住女友麥明詩媾女而激嬲女友，而同麥明詩合作拍劇集《賭城群英會》嘅何浩文（Dominic），就被指乘虛而入力追麥明詩。日前麥明詩喺巴西主持完奧運節目返港，都唔見林作接機，佢哋似乎仲係冷戰階段。估唔到Dominic同麥明詩合作拍完劇之後，竟然喺葉念琛部新戲《失戀日》「再續前緣」。呢部戲由鄧麗欣（Stephy）做女主角，雖然未公佈男主角人選，但就搵咗麥明詩同Dominic做情侶真係夠晒噱頭。
林作唔答
馮仁昭噚日問林作驚唔驚，佢就透過WhatsApp話：「演員專業，大家做嘢，但由於實在太經常無端端被Louisa（麥明詩）的動向造新聞，以後都係一概唔答啦，我唔想太過被擺在一起。」至於Dominic會唔會同麥明詩有親熱戲？佢話：「未知喎，不過情侶間就好親密㗎啦。」講到佢近水樓台加速發展機會，Dominic就大搞爛gag話：「重點喺個樓度，係好流呀！哈哈哈！」
Dominic噚晚就同麥明詩喺荔枝角開工，佢哋仲有拖手戲份，撞啱放工時間，所以途人經過都有眼望望。
撰文：馮仁昭