八方相當年：
怪醫愛竹戰　做大牌唔食雞糊 - 李八方

有怪醫之稱嘅現屆立法會醫學界議員梁家騮，喺立法會散檔前拉布拉死政府提出嘅醫委會改革條例，臨別議會前人氣急升。原來佢呢種鍥而不捨嘅精神，都反映喺打麻雀上。騮哥話當年喺中大醫學院同做實習醫生之時，不時同同學打麻雀消遣，佢經常做牌，雞糊唔食，要食就食最大，試過連食兩鋪清一色番子對對糊。佢話打麻雀都係遊戲一場，追求完美，但唔需要考慮實際輸贏。
54歲嘅騮哥自爆當年麻雀腳包括現任港島西醫院聯網總監陸志聰、中大精神科學系教授榮潤國、現任養和醫院外科醫生陳志偉同中大保健處處長陸偉昌醫生。佢表示陸志聰做牌得嚟好理性務實，做唔到就放棄，榮潤國比較少做牌，大家都有輸有贏。
身為中大醫學院首屆畢業生，雖然畢業咗30年，騮哥仲好懷念當年嘅校園生活。當年中大校園同威爾斯親王醫院好少建築物，地方大好多嘢玩，佢仲有打排球、踢足球，更加係中大乒乓球校隊隊員，住宿舍住到唔捨得返屋企。

自爆港大面試被out

騮哥自爆當年曾經到港大醫學院面試，因為面試水皮被out，之後就讀中大。但佢話就算港大收佢都未必讀，因為港大校園零散，中大校園大好多，好快已對醫學院好有信心，覺得係發展年輕人潛能嘅理想地。騮哥10幾年前攞埋醫學博士，但過去幾年醫生工作前景冇以前咁好，佢慶幸自己早出世喎。