澳至尊（2031）月頭上市不成，月尾即刻捲土重來，今次仲要全數靠散戶認購，咁樣嘅Plan B算係近年少見，唔通公司諗住靠晒代言人蔡少芬（Ada）吸引散戶？
主板新股招股，一般係九成國際配售，由芬佬認購，其餘一成就畀散戶公開認購。澳至尊月初上唔到市，就係因為國際配售反應差，今次兵行險着，100%靠晒散戶公開發售，主席蔡志輝話，經過上次，對公開發售「絕對有信心」喎。點解咁有信心？可能佢諗住有蔡少芬做代言人，散戶唔認得間公司，都認得蔡少芬啩。
張晉同蔡少芬倆夫婦2014年開始就擔任澳至尊代言人，招股書披露，佢哋跟澳至尊今年續咗約，到2018年2月第一期合約費用150萬元，第二期200萬元，包電視、印刷廣告各拍一次，同理出席三場推廣活動。聽講主席好想Ada兩公婆一齊出席上市儀式，不過拍戲檔期好難就，未確定係咪有時間。