圈中嫁咗俾富豪歸宿嘅女藝人，當兩隻腳踏入豪門開始，生活同品味都自動升格變成闊太少奶奶，不過世事嘅嘢，都梗有例外！
區海倫早年嫁咗俾老竇係香港三大紡織廠創辦人之一嘅陳仲尼後，試過俾人影到喺特價場掃貨。
至於其他做咗豪門少奶嘅女藝人，有啲繼續幫襯平民餐廳、有啲堅持搭小巴、地鐵，生活堅貼地！
陳伶俐：
自從同林敏驄離婚後，帶住兩個仔嘅陳伶俐，下嫁新加坡隱形富豪胡嘉烈後人劉頌銘，正式加入闊太行列。不過陳伶俐試過俾人影到幫襯茶餐廳，又試過食嘢嗰陣豪邁撩牙，生活間中都好平民吓！
陳少霞：
現年39歲嘅陳少霞，上月秘密下嫁坐擁8億身家、有中港「法拉利之父」嘅富商李文輝，出入有名車代步，入住老公位於淺水灣豪宅。經歷咗同澳洲富商夫婿離婚嘅陳少霞，當時就有傳佢要住公屋攞綜援。經歷人生低潮嘅佢，即使再嫁富豪，但早排就俾人影到喺雜貨店，同師奶鬥搶平貨，勁摷十幾廿蚊對拖鞋。
甄楚倩：
過氣歌手甄楚倩，自01 年為新加坡富商秘密誕下一子後，入住半山豪宅，一直深居簡出，不過自言過住少奶奶生活嘅甄楚倩，亦試過俾蘋果影到去灣仔平民商場修腳甲，搭小巴同地鐵，好鬼慳家！