家陣做立法會候選人一啲都唔容易，至少要有意志去對抗各式各樣突如其來嘅狙擊。好似喺新界西爭取連任嘅公民黨郭家麒咁吖，周日喺荃灣拉票時，就受愛字頭噪音滋擾。
話說郭醫生好哋哋同義工喺屯門卓悅居附近叫咪兼派競選單張時，突然有架寫有「我們要安居樂業反拉布」嘅車駛至，仲停咗喺佢哋拉票地點附近，猛播錄音聲帶，大致係鬧公民黨禍港，附近亦有人派單張，斥責有人煽動佔中，呼籲要踢走泛民等。
郭醫生憶述佢哋去到邊，架車就跟到去邊，確實係好滋擾，但佢哋一啲都唔驚，繼續做好自己嘅拉票工作。佢話呢種貼身滋擾係今屆選舉首次遇到，唔知隨住選舉日近，滋擾會唔會日增？都係嗰句，最緊要做好本份。該區其他參選名單，請參閱本報立會選戰網站 http://hk.apple.nextmedia.com/legco2016/region 。