安踏體育（2020）有份贊助今年里約奧運中國國家隊其中十個項目，唔好以為有奧運幫手宣傳就可以刺激銷情，原來未必㗎！安踏執董兼品牌總裁鄭捷噚日喺業績會上就話，今年因應奧運，期內宣傳同推廣費按年增加0.2個百分點至11.2%，全年亦唔會用多過13%。
佢好坦白咁講，贊助奧運對銷售嘅短期刺激作用有限，只係長遠而言有利品牌發展，帶動品牌知名度，無形間能帶動銷售。
不過，鄭捷好開心咁話，今年中國運動員拎到26面金牌，計埋其他獎牌數目，公司嗰件「冠軍龍服」上台拎獎出鏡嘅次數就高達70次。除咗中國隊，原來香港隊嘅戰衣都喺由安踏旗下FILA贊助，目前FILA嘅收入佔比為20%。