效力過NBA球隊火箭嘅中國名宿姚明，每年都會舉辦慈善籃球賽，佢今屆就邀請到拿維（Zach LaVine）同A哥頓（Aaron Gordon）帶領NBA明星隊，周日喺福州同中國男籃打番場；兩位入樽王都勁識做，以114:119輸畀中國隊。
王哲林高呼想打NBA
邀請到拿維同A哥頓呢兩位上季NBA入樽賽頭兩名同場獻技，球迷梗係想睇到佢哋瘋狂鋤樽啦！佢哋都冇令粉絲失望，A哥頓仲模仿名宿麥基迪（Tracy McGrady）自己拋波上籃板入樽，同埋「郵差」馬龍（Karl Malone）單手摸後腦嘅招牌入樽動作，令到全場觀眾睇得好開心。
由兩位入樽王領軍嘅NBA明星隊都好識做，喺留力嘅情況下以五分之差輸畀東道主，無謂傷盡一眾球迷嘅心啦。
喺今年NBA選秀會入面，俾灰熊以第二輪籤抽中嘅王哲林，今場為中國上陣17分鐘，但係表現就麻麻喇，三投一中只係入得三分；呢位22歲嘅中鋒喺賽後就毫不掩飾想去NBA打波：「我仲未知道自己可唔可以喺新球季登陸NBA，但好希望得到呢個機會。」至於喺選秀會俾火箭揀中嘅周琦，就只得五分進賬。
好可惜呢場慈善賽嘅籌辦人姚明冇親自落場打，如果唔係，佢可能打得仲好過呢兩位師弟。