巴塞贏波是常識吧！周日西甲巴塞作客畢爾包，憑中場拿傑迪錫頭槌建功贏1:0，係教練安歷基第100場勝仗；不過，門將達史特根雖然全場有51次成功傳送，打破西甲門將單場傳送紀錄，但一次誤傳幾乎搞到失波，係咪荷蘭門將施利臣加盟搞到佢心亂如麻呢？
樑仔上身幸保不失
安歷基上季用智利門將哥迪奧巴禾踢聯賽，達史特根就踢歐聯，但前者已經轉投曼城，新一季咩玩法仲未知，不過周日場聯賽就由達史特根把關。達史特根或者想學德國前輩紐亞咁做一位全能門將，成場波頻頻控球、短傳畀隊友之餘，仲不時賣弄腳法，西班牙《馬卡報》就統計，達史特根全場作出62次傳球，有51次成功，係西甲賽會自05/06球季有呢項統計以嚟嘅新紀錄，足足比舊紀錄46次多五次㖭。
不過，一次意外足以致命，達史特根12分鐘一次乏力傳送，俾畢爾包中場比納特截到，大步推到禁區頂勁射，好彩達史特根唔顧靚仔樣，用漫畫《足球小將》樑仔嘅絕技顏面救波，先大話夾好彩保住唔失波。除咗唔失波，要贏波始終都要靠入波，21分鐘阿達杜倫左路傳中，克羅地亞中場拿傑迪錫頭槌飛頂入網，巴塞亦憑呢個入球小勝1:0，保持開季兩連勝。
安歷基：施利臣未出得
呢場贏波對安歷基好有意義，因為係佢帶隊126場以嚟嘅第100場勝仗，當中西甲佔61場，歐聯就有18場。安歷基賽後話要作客贏畢爾包係好困難，呢三分拎得非常辛苦；不過，佢就冇講未來起用門將嘅部署，只係話荷蘭門將施利臣仲處於適應期，要同隊友夾好默契先可以上陣，睇怕暫時都要重用達史特根嘞。
