新界東嘅立法會選舉堪稱今屆選舉焦點，除咗名單多，參選人個個都好惹火，而且仲有好多奇人異士，不得不講就梗係陳玉娥。但八方今次唔講佢，點敢想愴佢個心？查實噚日港台嘅選舉論壇出現罕見挑機一幕，白鴿黨林卓廷竟然向香港復興會陳云根（陳雲）挑機，仲要踩入陳雲好活躍嘅facebook平台，話對方好多瘋言瘋語。嘩，呢鋪輪到林卓廷冇食藥？勇字當頭同「國師」開戰？
慢必加把嘴抽擊
話說林卓廷喺論壇上向陳雲翻舊賬，話對方喺2014年4月30日嘅fb咒罵去六四集會嘅人要「落地獄、五雷轟頂、早死早着，無一倖免」，質問對方點解要咁狠毒，詛咒參與六四集會嘅人？
國師最初話冇回應㗎，試問林卓廷又點會放過佢？林卓廷質問國師點解唔答，「係咪唔敢面對香港市民？」繼而繼續進擊，話陳雲嘅fb有大量瘋言瘋語，請大家上網睇睇。
嗱，fb呢個地盤，國師係專業用家，點可容忍俾人踩？所以國師開腔插嘴，以「fb嘅嘢你識條鐵」嘅態度反駁：「你根本唔識得玩fb就唔好喺到亂講嘢，所以唔回應。」
點知其後發言嘅人力陳志全，都就住fb言論向陳雲進擊，話熱普城支持永續《基本法》、即係要修改《基本法》，如要修改即係要立法會三分二議員支持，但陳雲喺fb話，非建制派關鍵少數唔重要，投晒畀佢就得，「咁係咪呃緊香港市民呀？點會關鍵少數唔重要？」之不過呢，呢次陳雲就一味擰頭，拒絕再開金口。
其實當國師表明撐丁權甚至套丁後，林已經好質疑，莫非呢位廉署先鋒想向國師挑起火頭？該區其他參選名單，請參閱本報立會選戰網站 http://hk.apple.nextmedia.com/legco2016/region 。
李八方
mailto:[email protected]