一向畀人印象賣樓嘆慢板唔憂賣嘅華懋，將軍澳海翩滙以低價開盤，造就近幾年華懋新盤都要排長龍睇樓嘅墟冚盛況，收3,000幾票，破晒紀錄。有見及此，華懋賣樓主帥吳崇武（武哥），出動埋溫情牌，每日向地產代理奉上「吳太靚湯」，慰勞佢哋。
武哥話，特意要求太太每日諗計整個「吳太靚湯」，每日煲乜嘢湯就由太太諗，日日諗一款新嘅湯，將概念同材料交由如心酒店大廚去煲，每日限量60碗，主要慰勞在場代理。噚日就煲清補涼，夠晒清熱，仲同在場傳媒分享，華華試過確實幾夠火喉。
呢個「吳太靚湯」就只限同代理分享，睇樓客就冇咁嘅安排，但武哥都有安排酒店提供嘅湯水畀佢哋。海翩滙今次成功幫集團反底，除咗個價錢之外，一班代理積極撈客應該居功至偉，所以有特別靚湯飲都合理嘅。