Pokémon GO熱潮未退，除左丁山這類過氣人物之外，不少人士、男女老幼，都玩得高興，甚至話有和睦家庭、親子之良好副作用，兼可刺激自閉人士離開家居，願與人群聚會云云。
有朋友取笑左丁山係科技盲，手遊盲，之前不識Candy Crush，現在不玩Pokémon GO，實難以在21世紀呼吸新鮮空氣，且看日本安倍晉三貴為首相，也不惜秘密前往里約熱內盧，扮演遊戲機人物馬里奧，製造驚喜，為2020東京奧運宣傳，獲得網上無限like（幾難想像習近平或李克強願意在同樣場合扮演類似角色，有這一天的話，本土派學生難言港獨），既然如此，左丁山實在應該在中環IFC試玩捕捉小精靈。
未加入玩家行列之前，首先問問年輕校友一啲手遊資料，師弟Y話不如搵一位真正有認識之人到校友會九月份午餐演講，因為佢淨係識打機嘅啫。於是打電話搵退休（唔年青㗎）科網總裁T，叫佢介紹，總裁T話十六年前請過一位尖子做電腦程式員，呢位尖子P確實有料到，到校友會演講實啱，於是經一輪電郵、WhatsApp之後，再經師弟Y與尖子P聯絡好，就敲定咗下星期三嘅題目：「二次元文化與手機遊戲帶來之商機」，左丁山一睇，暈得一陣，何謂「二次元」？師弟Y解釋：「就係要你嚟聽啦，年青一代興起二次元文化，二次元與我何干？對手機遊戲行業又有何影響？如何帶來經濟效益？熱潮能持續嗎？」這正是所謂新經濟，老一代不懂，就要學習，或者問吓放工之後仍然掛住打機嘅三十歲父親。
尖子P何許人也？師弟Y話有咁啱得咁蹺，佢一位朋友就係尖子P在崇基學生宿舍應林堂嘅同房，知道尖子P係1994年全港會考十優狀元，明報曾經為佢寫過一篇社論，指單親綜援家庭學生奮鬥創新天。尖子P後來拔尖入咗中文大學工學院訊息工程系，一級榮譽畢業後，就到史丹福大學讀電子工程碩士，一攞到學位就俾總裁T慧眼識英雄，遊說佢返香港入佢嘅科網公司工作，現已獨立創業。
有如此人物講二次元文化與手遊，左丁山或者會聽得明啩。講到創新科技，無法子唔向啲70後，80後，90後學習，將來甚麼科技股，一飛沖天，都會係佢地創立嘅，有啲可惜嘅係，香港嘅讀書尖子，絕大部份讀醫，做咗醫生搵銀的確係快夾易，但另一方面就係本港科技創新業嘅人才損失，要有多啲尖子讀電子電腦工程系，香港先至在科技方面有得發展。