九龍西立法會選舉今屆七個女人一個墟，之前被視為尾席大熱嘅青年新政游蕙禎選情放緩，相反小麗民主教室嘅理大學者劉小麗卻後勁凌厲，民調顯示有望力爭第6位。
身水身汗派傳單
唔少人希望小麗入局，想要有質素嘅議員，包括曾經做過九龍東議員嘅鄭經翰。鄭大班噚日去到石硤尾白田邨，為呢位選戰新人打氣，甚至唔怕身水身汗落手派傳單㖭。
八方問過小麗，佢話因為上D100節目而認識大班，小販事件令大班對佢有印象，而佢關注長者問題，亦同大班取態一樣，所以大班肯撐場，笑稱唔少街坊都認得大班，「啲人識得佢仲多過識得我」，仲話大班真係好好人，應承若有時間會再助選。小麗承認，論壇表現或加深市民對佢嘅認知，一定會繼續努力。該區其他參選名單，請參閱本報立會選戰網站 http://hk.apple.nextmedia.com/legco2016/region 。