到底上市公司個名可以有幾長？最近有間「揚州市廣陵區泰和農村小額貸款股份有限公司」申請喺創業板上市，佢認第二，睇怕無人敢認第一；佢呢個名仲充滿地理知識㖭喎。
為咗簡單起見，先將呢間公司簡稱為「泰和小貸」。點解佢咁在意「揚州市廣陵區」呢個地方？睇番資料，泰和小貸原先喺另一個區成立，做小額貸款業務，之後政府重新分區，公司總部變成廣陵區，可能係咁，泰和小貸就用呢個名，名長又唔易跟其他公司撞名。
不過，舊年3月公司已經獲批喺揚州全市開展做小額貸款，如果將來可以做到全國都可以放貸，唔知泰和小貸個名前面，會唔會再加埋「中國江蘇省」，以凸顯自己嘅發源地呢？