係咪覺得今屆立法會選舉，名單多到眼花撩亂呢？唔少候選人搵嚟不同界別人士撐場支持，歌手黃耀明自然係搶手貨。明哥噚日連環為港島兩名候選人站台拉票，唔好怪佢心多，只係兩人各有所長，咪連環推介撐一撐，不過八方都知港島選民仲係好難揀，因為得一票咋喎……
明哥噚日下午先到銅鑼灣街頭，出席香港眾志主席羅冠聰嘅造勢會。成班支持者逼爆街頭，場面好熱鬧。黃耀明上台發言時笑笑口話聰聰做得佢個仔，一個年輕人竟然肯為香港前途走上陷阱滿佈嘅政途，呢份承擔唔係好多人有，梗係要支持吓。佢仲話覺得呢個後生仔有一份能量，可以將唔同界別人士拉埋一齊，好需要佢將香港團結，講完仲同聰聰嚟個抱抱㖭。
話何EE癲癲哋
其後明哥就轉到立法會外上車，拍住工黨何秀蘭甜蜜蜜遊車河。港大民調顯示何EE選情未穩，暫時排第7，有出局危機，不過明哥除咗撐場，仲憶述同何EE嘅一段情。
佢話兩人喺2012年因為搞國際不再恐同日而相熟，憶述第一次同何EE交手，覺得呢個人真正企喺同志同性小眾嗰邊。至2013年頭，盛傳梁振英會喺施政報告就性傾向歧視立法做諮詢，最終卻轉軚，當時何EE提議搞大愛同盟，結果兩人成為同盟上親密戰友。
明哥話同志作為弱勢社群，好辛苦，「而呢個人（何秀蘭）癲癲哋，佢直不甩，一路咁企喺同志身邊」，覺得議會需要新動力，但都需要資深人士。
該區其他參選名單，請參閱本報立會選戰網站 http://hk.apple.nextmedia.com/legco2016/region 。
李八方
mailto:[email protected]