西甲「馬德里雙雄」皇家馬德里同馬德里體育會，上季分列二、三位，不過新一季戰績真係差得遠，皇馬上周六主場對切爾達，仍然有基斯坦奴朗拿度（C朗）缺陣，好在回流嘅艾華路莫拉達先開紀錄，亦係佢重返皇馬後嘅首個入球，加上卻奧斯入多球奠勝，皇馬以2:1險勝切爾達，聯賽兩連勝。皇馬賽後仲有好消息，C朗上載自己做gym片，仲預計國際賽後就可以幫球隊上陣，而佢亦都缺陣葡萄牙嘅大軍名單。
施蒙尼最差開季
相反馬體會開季就真係唔順，雖然法國前鋒基沙文有份落場，仲同同胞加美路合組雙箭頭，不過作客升班馬雷加利斯就咬唔入，悶和0:0，開季兩戰都係和波收場，係教練施蒙尼接手以嚟最差嘅開季戰績；基沙文睇到球隊戰績唔好就火都嚟埋，賽後話如果球隊再係咁就要護級。
