牙買加飛人保特喺里奧完成「3x3」嘅奪金創舉後，似乎要開P玩足一星期慶祝！據英國傳媒報道，呢位30歲嘅飛人喺上周去到倫敦之後就晚晚要開P玩，仲每晚都帶唔同嘅囡囡返酒店，佢仲搵自己啲奧運金牌扮道具，頒獎畀呢班女伴㖭。
據英國《太陽報》爆料，保特自從上周一去到倫敦後，幾乎每晚都要開P，而佢上周就喺一間位於梅費爾區嘅高檔夜總會狂歡，佢仲同班囡囡講：「如果你哋肯畀我睇吓個胸嘅話，就會有獎勵！」至於係啲咩獎，保特就梗係要賣個關子，冇即刻同啲囡囡講啦。
晚晚開P 無女不歡
當保特帶晒班囡囡返酒店繼續玩之後，呢位牙買加飛人突然將自己喺里約贏得嘅100米、200米同4x100米接力金牌攞出嚟做道具，嗌呢班囡囡要扮企喺頒獎台上面等攞獎。有咁多妙齡少女圍住保特，當然會出現一啲爭風呷醋嘅場面啦！據聞當保特頒獎畀班囡囡嗰陣，就有其中一位問佢：「我哋咁多個人，邊個先係你心目中嘅第一位先？」正常人可能會俾呢個問題考起，不過呢個問題真係完全難唔到保特，呢位牙買加飛人仲講笑咁話：「我嘅奧運獎牌全部都係金牌，所以都唔使分邊個係冠軍啦。」運動員要贏到奧運金牌係一件唔容易嘅事，不過呢班囡囡要攞到呢啲獎牌，似乎淨係𠱁到保特開心就得囉。
愛上倫敦 正印發火
保特蒲完之後仲同班記者講：「我𠵱家朝早就攞嚟瞓覺，夜晚就全晚都去開P；對我嚟講，倫敦喺呢一刻就係最正嘅城市！」雖然保特講過話自己想跑埋下年嘅世錦賽先退役，不過呢位30歲嘅牙買加飛人咁玩法，會唔會玩殘自己搞到要提早退役？同時，保特嘅正印女友姬絲睇到呢啲新聞就唔多高興喇，佢喺twitter仲話要控制自己嘅情緒；唔知保特返到牙買加之後，姬絲係咪會忍唔住發火同呢個爛滾男友分手呢？