中國廣電總局日前公佈整治改革情況，提到遏制天價片酬同明星炫富問題，又有報道播出演員天價片酬專題，提到《如懿傳》嘅霍建華同周迅一共拎走2.5億人仔，有傳廣電總局關注明星天價片酬一事。
大陸市場最近發展電影電視業迅速，單係熱爆「小鮮肉」好似李易峰、林更新、吳亦凡、鹿晗、黃軒個個片酬拍一集劇開價超過一百萬，而拍電影就收過千萬人仔。
中港台藝人收咁高片酬，點解仲有價有市？原理好簡單，源於大陸網站興起，百度、愛奇藝、土豆、搜狐及騰訊等，為咗爭客、爭點撃吸引人睇，出天價買片、買劇播，如買《如懿傳》播放權就用咗8億元人仔，而愛奇藝用咗4億元人仔買《瑯琊榜2》嚟播。由於用當紅藝人拍，賣畀網站嘅價錢就會高，反而目前電視台都未必出到呢個價。有價有市難怪片酬開得咁高。
有指廣電局諗住搵網站一齊商討有關「壓價」中港台一線藝人，不過大陸各網站一向唔齊心，相信此舉未必有效，有資深影圈人透露多年前，已試過打壓電視藝人薪金，希望藝人薪金唔高於製作費嘅30%，之但係有啲製作方就私下畀錢嚟瞞電影局，最終都未能成功打擊。