拉票都要唞唞氣，何況係生日呢？喺港島區同新界西分別爭取連任嘅新民黨葉劉淑儀同田北辰，日前約埋該黨新東之星容海恩喺總部聚首（圖），唔係分享選戰心得，而係慶生，皆因葉劉24日生日、二少則係26日，兩位今年66歲，齊齊喺總部同職員切蛋糕，暫忘選舉嘅緊張輕鬆一下。當然切完蛋糕，各自又要趕下一場拉票咯!
葉劉喺facebook話呀，新民黨成立之初，外界預言佢同田二少必定「火星撞地球」，甚至3個月內就會分道揚鑣，事實卻係5年過去嘞，佢哋雖然偶有意見相左，但新民黨依然有不俗嘅發展。至於生日願望，當然係立會選舉有好成績啦。該區其他參選名單，請參閱本報立會選戰網站 http://hk.apple.nextmedia.com/legco2016/region 。