今屆港男選舉殺出「細佬兵」好似王浩信弟弟王瑋彤都參選港男，本來入圍今年「香港先生」，可惜因為身體問題退選，而演《愛．回家》馬子仁嘅羅天宇，佢同母異父弟弟胡㻗（Fei）都有參選，本來被foul，點知公佈完入圍名單後，羅天宇弟弟胡㻗離奇「復活」。
胡㻗今年22歲喺加拿大讀書，佢曾於2012年以「羅駿宇」參選亞視《亞洲先生》，今次提名佢選港男嘅就係阿哥羅天宇，話晒阿哥羅天宇喺2008年係港男少年組冠軍。講到點解「復活」，胡㻗就冇講，阿哥羅天宇亦講過唔知點解佢「復活」，之但係佢尊重公司決定，原本想叫細佬出年再試。