今年大台復辦港男，入圍最後十強之一嘅胡㻗，原來係大台「銀河十星」胡越山個仔！唔止咁，同樣入圍嘅楊灌澤就係藝人程可為嘅姪仔。其實咁多年嚟嘅選美比賽，唔少人都有「後台」，但上唔上到位就未必喇：
張名雅：
張名雅舅公係香港著名電影人張堅庭，2012年參選港姐獲冠軍。不過星途唔夠同屆亞軍黃心穎同季軍朱千雪好。張名雅參選以來是非緋聞多籮籮，傳過整容同墮胎，觀眾緣欠佳。
湯洛雯：
湯鎮業姪女湯洛雯，同張名雅一樣係2012年參選港姐，三甲不入但拎咗旅遊大使獎、美麗昇華大使獎兩個豬肉獎。
趙希洛：
2007年以原名「趙嘉迪」參選，入選到最後5強。趙希洛媽媽梁小玲係麗的映聲第二期藝員訓練班畢業生，趙希洛啲長輩就仲猛料，包括李司棋、黃淑儀、盧大偉同黃韻詩等等。
鄧上文：
鄧上文爸爸係「屯門王子」鄧英敏，2005年參選香港小姐，仲贏埋季軍o添。之後佢喺大台拍過幾套處境劇，好似《高朋滿坐》、《畢打自己人》咁，10年同澳籍健身教練男友 Andrew 結婚兼待產，冇同大台續約。
沈穎婷：
沈穎婷媽媽係麗的當家花旦李影，佢喺2004年參選但未有名次。星途發展亦不如媽媽理想，喺09年曾短暫轉投英皇，但未夠半年就主動提出解約，之後轉行到酒吧推銷賣煙。