於美國息口「欲加難加」及深港通憧憬加持下，縱然全球經濟壞消息越來越多，港股仍能於6月底企穩，並反覆升至現時約23000點水平，惟多數散戶只係「得個睇字」，升浪中無得益。有前輩跟密西比說，不要以為只是散戶「走雞」，號稱專業的投資者亦「不遑多讓」。
前輩說：「個市雖則話係升市，但其實堅難炒，好似啲股有好消息唔會即升，好多時會等三、兩日，攞番同一個消息先炒上，根本亂嚟，無路捉嘅程度前所未有，你可以話係因為內地資金多咗，亦可以話係市場無方向，加上越炒越短，所以咪越嚟越難炒，越嚟越難賺錢。」
太誇張了吧？前輩續說：「一啲都唔誇張，有份報紙嘅投資擂台，個個參加者唔係券商董事，就係研究部主管，照計一定比普通散戶，可以接觸更多資訊，同埋有更豐富財經知識，但結果係無一個倉𠵱家係有正回報，蝕得最多嗰個，跌幅仲接近30%，你自己諗吓啦。」
突然想起張達明於電影《衝鋒隊怒火街頭》中對白——有沒有見過小李飛刀經常參加飛刀比賽？
密西比