新秀麗（1910）完成收購美國Tumi之後未到一個月，就即刻搵番Tumi行政總裁（CEO）Jerome Squire Griffith做非執董。大家有冇覺得呢個名幾面善呢？佢就係當年傳過，有機會接替高漢思做思捷（330）CEO嘅仁兄，不過佢最終只係做到營運總裁（COO），冇升到CEO就走了。
Griffith喺2002年至2009年受聘思捷，成為北美洲及南美洲總裁，當時佢都有諗過喺思捷做CEO，不過思捷就冇辦法畀佢呢個機會，結果佢轉咗去做Tumi行政總裁。
思捷股價一度由佢走咗之後嘅40元，升到上63.5元，不過之後一直向下沉，到家陣只係剩得6.58元，較高價跌咗差唔多九成！反觀Griffith去咗Tumi做CEO後，公司越做越有，成為著名旅行袋品牌，仲俾新秀麗高價收購。
Tumi嘅成功，或者就多得Griffith做思捷嗰陣喺美洲嘅營運經驗，如果時光可以倒流，當年思捷班管理層會唔會畀佢做思捷CEO呢？