投票前夕，由周融創立嘅親建制網媒《HKG報》話收到消息，話可能再有主張港獨嘅候選人被踢出局，約喺中國運動員離港後公佈：「主張港獨者即使入到閘也未必出到閘，隨時因為『宣獨』過度而中途被OUT。」
陳澤滔話未有人搵佢
該報同時引述消息話，今次被取消資格嘅人唔會太多，旨在凸顯當局嘅原則，「主要是一些觸及底線，持續講、重複講、每逢選舉論壇就講港獨的人」，話選舉主任同緊佢哋接觸，「幾個來回，掌握材料後就會有決定」。
若然要out人，最大可能係九龍東參選嘅東九龍社區關注組陳澤滔，佢喺論壇表明支持港獨，仲俾同區對手去選舉事務處舉報，但陳澤滔同八方講，噚日發現之前收到疑似民政事務總署嘅電郵，查問有乜政綱，但佢查過該署冇呢個人，唔知係咪假電郵，所以冇理，至今未獲官方正式查詢。陳更話由被指冇人識到盛傳會被取消資格，即係代表佢有機會贏，重申主張香港獨立、支持民族自決立場唔會變。該區其他參選名單，請參閱本報立會選戰網站 http://hk.apple.nextmedia.com/legco2016/region 。