港版日本Bruno電熱鍋上個禮拜五預訂，限量粉紅鍋唔使一個鐘沽清，被粉絲圍插點解唔出多啲貨。粉紅鍋現貨8月31日星期三率先銅鑼灣Sogo開賣，Bruno代理阿葉同費清話已經嚴陣以待，為免混亂，屆時會派籌截龍，為增透明度，周六在官方Fb專頁講清楚安排。
阿葉話，8月31日SOGO就有120個粉紅鍋，9月1日City'super時代廣場就有130個。Francfranc嘅3間分店各12個。一田9月14日開賣，有過百個煲，「粉紅鍋無貨嘞，紅、白色煲仲有貨預訂。」
港女對紅粉緋緋嘅家電情有獨鍾，連啲中佬都話要粉紅色，難怪小家電品牌Kenwood最近歷史性推出咗彩色系列釱金屬專業廚師機，仲攞埋reddot設計獎。Kenwood助理品牌經理Michelle同費清講，主婦非常「好色」，要靚靚啲家電將廚房變成showroom，Kenwood都要變身出咗粉、黃、藍、綠同銀色機身既廚師機，「不過講到最搶手，都係粉紅色。」
Michelle話，啲消費者好鬼精明，要「財色」兼收，買一部廚師機，抵得住買一大堆廚房家電，慳錢又慳位，呢部彩色專業廚師機，由搓麵糰、做麵包、榨果汁、整意粉都得；仲可裝附20多個配件，碎肉、切菜無難度，「廚師機除咗唔可以煮熱啲食物，其家乜都做到，好方便。」
費清＃要生計，也要生活＃毋忘初衷