汪阿姐明荃召集一眾老友食晚飯，去陸羽二樓飲杏汁豬肺湯、吃雲腿鴿肉甫、紫薑生炒骨等等，一聽見就肚餓，怱忙仄吓時間表先，咦，得喎，該晚冇約會，梗係準時赴會啦。
阿姐請食飯，必有嘢講，呢晚就講佢每年一度登台，與羅家英組成嘅福陞粵劇團在9月14至18日於香港文化中心大劇院演出六場戲三套劇目，公開發售門票嘅幾場有9月15、16日晚上7時半，蝴蝶夫人；9月18日下午1時半枇杷山上英雄血；9月18日晚上7時半，楊枝露滴牡丹開，總共四場有門票公開發售；其餘兩場係包場，9月14日晚只有少量門票發售，9月17日晚無公開售票。
五日做六場戲，唔辛苦咩？阿姐話：「只要有期有戲，點都唔怕辛苦。」戲就時常有嘅嘞，但係文化中心嘅檔期就好寶貴，唔係咁容易攞得到，所以阿姐為八和子弟演出場地着想，極力向西九文化局爭取首先建造「大戲棚」曲藝中心，現在已有雛形，兩年後應該可以落成啟用，成為西九第一座有用建築物。唉，西九拖拖拉拉曬太陽十幾年，認真浪費資源，假使當年唔係有短視文化人反對害事，西九私人興建嘅科士打猛龍已照耀西九，成為香港文化聚焦點啦。
往事不談也罷，汪阿姐能促成西九大戲棚之建設，本地粵劇史會記佢一功。今次福陞劇團主打「蝴蝶夫人」係新意思喎。大家都知道Madame Butterfly是Puccini之意大利歌劇經典，名揚世界，粵劇劇本原由葉紹德編劇，今次上演就由羅家英再自葉紹德劇本改編，女主角當然就係汪阿姐啦，美國軍官平克頓上尉就由羅家英擔當，其他演員有尤聲普、新劍郎、呂洪廣、李沛妍與高麗。其中李沛妍係粵劇界名人、八和會館理事李奇峰嘅千金，汪阿姐嘅契女，出身於美國衞斯理學院，即宋美齡女士與希拉莉克林頓嘅小師妹，曾於日本深造精通日文，故此汪阿姐決定演出蝴蝶夫人後，委予契女重任──負責資料研究與協助搜購日本服裝（20世紀初），阿姐話：「啲古裝都幾貴，今勻不惜工本也。」用粵語唱改編意大利歌劇幾考編劇與演員功力，演出時附中英文字幕，方便外省及外國觀眾欣賞。