香港有很多球迷，要支持一支球隊，除了睇球賽、買波衫、追球星，仲可以去到幾盡？一年前，香港就有位曼聯球迷，將自己身份證上的英文名，加上「Man United」（曼聯簡稱），話要代表一生人都追隨這支球隊。環觀全球，為愛隊而改名的又豈止他一個……
身邊朋友會點稱呼？「曼聯囉，叫我曼聯，或者會叫我曼聯仔。」28歲的羅健鋒支持了英超球隊曼聯14年，起初跟不少紅魔迷一樣，因為碧咸而開始追捧這支球隊，聲稱一場曼聯比賽都無錯過收看。生係紅魔人、死為紅魔鬼，去年暑假，他將自己身份證的英文姓名，改成「LAW, Man United Dick」，放到網上群組分享時寫上：「將我這輩子都奉獻給了曼聯」。事件曝光後，除了本地傳媒，甚至英國《每日鏡報》等都有報道，「事後有位芬蘭球迷add我facebook，話都想咁樣改。有次過關時，入境處職員走來問我係咪好鍾意曼聯。」
「我想做世上最忠實的華人曼聯球迷，目標想成為曼聯係中國地區的推廣大使。」事隔一年，我們找到這位「曼聯」分享當時做這決定的決心，「當時有朋友同我講，既然你咁鍾意曼聯，有本事就喺身上紋一個曼聯隊徽，但我諗諗吓覺得紋身都幾痛，適逢嗰陣要換領新的身份證，就忽發奇想不如改名，其實都考慮了幾個月。」家人沒有反對？「因為中文姓名係父母改給我的，所以我只改英文名……家人唔係太介意。可能有人會覺得改名做曼聯係一件瘋狂或出格的事，但我認為咁係其中一種支持曼聯的方式。」
由去律師樓、再到入境處申請改名，獲批後又要更換證件、銀行戶口、信用卡以至稅單等十多項有舊名的資料，為此可能加加埋埋花費了數千元，顯示「曼聯仔」改名決心有幾大，「其實事後都有少少驚訝自己點解咁大膽，但我唔會做後悔的事。」他透露，小時候曾有輕生念頭，追捧曼聯後，每星期等睇球賽，對人生多了期盼和精神寄託，而改名後經過了一年，仲開始籌備寫書，分享自己由支持球隊到改名的心路歷程，版稅全捐慈善用途，現向曼聯官方申請授權，目標明年中面世。
除了「曼聯仔」，香港還有一位22歲女球迷楊浩兒，五、六年前讀高中時，同樣因為追捧曼聯，於是用了「Manchester」作為自己的英文名。雖然沒加上身份證，但她笑指，自此她支持哪隊球隊便無人不知了。縱觀全球曼迷，保利加亞有位建築工人，用了10年時間，游說法院批准他將全名改成「Manchester United」，還在額頭紋上曼聯隊徽，認真去到盡！
記者：余 瑋
攝影：鄧鴻欣