去迪士尼玩嚟嚟去去都係公主同王子大團圓結局，八方斷估各位男士去玩，都係陪女伴居多㗎啦！不過迪士尼就話6月開始，多咗一班男性粉絲入場喎，點解嘅？新任行政總裁劉永基噚日喺傳媒茶敍解畫，原來樂園趁暑假不停力谷《星球大戰》結果殺出條血路，男性賓客比之前升咗5個百分點，連劉永基都講笑話，可能有啲爸爸留低老婆同囡囡，自己偷走去玩。
今年底仲會有鐵甲奇俠（Iron Man）主題園區落成，而且係全球第一個漫威動畫主題區，劉永基就希望，新主題區可以再谷多啲青少年同男性顧客群入樂園玩，仲想配合客群定位，第時加多啲Marvel元素入樂園。不過香港都有唔少女仔鍾意Marvel角色，不如請埋扮Iron Man嘅Robert Downey Jr嚟香港啦？吸多班女粉絲入場，劉永基就笑笑口，淨係話Iron Man得一個箒。如果請唔到Robert Downey Jr，會唔會變咗同佢都有幾分似樣嘅Eric Kwok現身呢？各位粉絲拭目以待。