容祖兒呢幾日喺網上「甫」咗幾段用「小喇咪」隨時唱K嘅片段，即時引發網民熱話，周圍撲「小喇咪」o添。
我哋帶住「小喇咪」街頭實試，搵到Vanessa同Melody試唱C AllStar嘅《天梯》，Vanessa由開頭話好驚，點知一唱就唱咗半首歌，佢嘅唱後感係：「300蚊都可諗諗佢，但個咪啲聲有啲delay，自己把聲同出聲有啲差別囉！」多謝兩位嘅完美示範。
到第二組別：情侶檔嘅Sharon同Thomas，男友話要用胡彥斌嘅《男人KTV》同女友表達愛意喎，Sharon即刻收到晒，點知Thomas試完話唔會買，但反而女友話：「幾得意吖，300蚊可以買嚟玩吓喎。」
呢支「掌上KTV」，我哋幫佢改咗個名叫「小喇咪」，即係咪高峰同小喇叭嘅結合，淘寶見到人仔250至400(約港幣300至470)都有，利用藍芽或者跟機嘅USB線駁落手機，再喺手機下載啲「K歌」App，揀好歌之後，「小喇咪」就會播出純音樂，手機會顯示歌詞，只要當佢普通卡拉OK咪咁用就得，仲可以調較音量同埋回音度，好有K房feel。唓！咁唔用咪清唱都得啦！知你咁講喇，所以動主播Cathy即刻試試「用咪」唱、同「唔用咪」唱嘅分別，即刻去片！睇吓你又覺得點？！