立法會選舉期間，怪事一浪接一浪。喺立法會教育界競逐連任的教協葉建源（圖），最近除咗俾人老屈將教育界選民轉成資訊科技界選民，近日又有教育界朋友，突然收到一個夾雜殘體字的電話短訊，話部份教育團體聯合舉辦的「立法会（會）教育界功能組別選舉論壇」，已獲候選人蔡若蓮同葉建源答應出席，將會就教育議題進行討論同接受提問，之後仲有茶敍時間。
葉建源方面同八方講，之前從無收到任何有關團體邀請出席論壇，所以無答應過出席，至今唔知呢個論壇究竟存唔存在，覺得今次事件好奇怪。
有教育界人士就指出，今次短訊所寫的協辦團體中，唔少有親建制背景，當中教育政策關注社張民炳及女教師協會周蘿茜，更有份提名教聯會副主席蔡若蓮參選㖭。