郭富城嘅《舞林密碼世界巡迴演唱會》噚晚繼續喺紅館舉行，而噚日下午事先張揚話「期待今晚睇城城演唱會！！覺得興奮！！！」嘅梁齊昕，噚晚就着住對5吋高踭鞋亮相，但咁就出事，搞到喺場外仆親。
喺8點半左右，齊昕由司機車到紅館，但佢去到現場唔肯落車住，搞到警察嚟到話佢阻塞交通，仲叫佢一係落車一係開車，記者上前問齊昕係唔係城城fans，佢就話：「係啊，12年開始睇佢，今次同朋友嚟睇。」齊昕仲問記者可唔可以帶水入場，其間齊昕仲向記者介紹佢個司機。
過咗一陣齊昕終於落車，一落車行唔夠十步，就成個人仆咗喺街，記者即上前扶佢起身，齊昕右腳流血，紅館工作人員帶佢去正門，搵急救人員幫佢急救，之後就冇見齊昕出嚟，估計由特別通道入咗場館。