唔少家族企業嘅二、三代開始接班，睇番舊年年報，相信利豐（494）馮裕鈞（Spencer）年薪之高，算係數一數二。佢一早加入利豐，前年升做行政總裁，2015年就袋走咗313.6萬美元（約2,446萬港元），仲高過新世界發展（017）第三代接班人鄭志剛同華置（127）主席劉鳴煒。
人工高本來冇乜問題，問題係利豐近年生意一般，剛公佈今年上半年業績，仍然未見起色，純利同中期息都少咗，大家當然好關注管理層會唔會減薪「共渡時艱」喇！噚日業績會上，馮裕鈞就冇直接回應，只係話「好難答你，需要董事會決定」，仲話集團薪金水平低於大市、要保持有競爭力云云。吓，言下之意，唔通仲想加人工？