一間公司有兩位唔同姓嘅太子爺？講緊係上市唔夠一年嘅現代牙科（3600），呢間公司係由大股東陳冠斌與朋友魏聖堅合作經營，魏氏持有近一成股份，屬第二大股東。
陳冠斌與魏聖堅嘅兒子分別出任公司執董，噚日兩位一齊出席業績發佈會。外表比較青靚白淨嘅係陳奕朗（圖右一），今年30歲，佢本身係牙醫，加入公司四年，負責公司策略規劃、銷售同埋市場推廣。
紥住頭髮嘅係39歲嘅魏志豪（圖右二），佢本身係律師，加入公司有10年咁耐，負責日常營運。雖然兩位年紀相差九年，但見兩位喺業績會後有傾有講，似做賽後檢討，關係似乎唔錯喎。
現代牙科𠵱家市值31億元，專門供應義齒器材，上市唔夠一年已經完成收購紐西蘭與澳洲相關業務，今年會大加美國投資，預料第四季完成，行政總裁魏聖堅（圖左二）預料，到時會成為北美地區第二大牙齒供應商。