參選九龍西嘅經民聯梁美芬（圖），每屆選舉都會為大家帶嚟驚喜，08年參選首次奠定「鼠王芬」美譽，今屆除咗喺「有冇P圖」一事上撕裂社會，另一話題之作肯定係佢嘅最新派台歌《反拉布之歌》，洗腦到連政治學者馬嶽都透過facebook相當重口味咁share，「我覺得大家真係應該睇睇，我哋香港社會，口味真係好多元化。」
呢首歌曲由林慕德借出，梁美芬填詞兼主唱，歌詞話「我哋要反拉布，我哋要香港好，我好鍾意香港㗎。再係咁拉布，實聽無嘢撈，我要供車供樓，又有幾個細路」；梁美芬仲喺MV入面同競選團隊，踩入茶餐廳、生果舖同西裝店「咪嘴」引吭高歌，娛樂性十足，難怪馬嶽咁「識貨」，但同樣share嘅中大社會學系副教授陳健民似乎唔多like：「這種人當選是品味的墮落。」該區其他參選名單，請參閱本報立會選戰網站 http://hk.apple.nextmedia.com/legco2016/region 。