近日有網民討論，如果香港開拍《自殺特攻：超能暴隊》（Suicide Squad），應該搵乜演員去飾演不同角色呢？有少數角色出乎意料地網民有共識，但多數角色巴打都有不同意見。
當中網民最有共識嘅角色莫過於小丑（Joker），巴打最支持黃子華飾演小丑一角，除咗因為子華係大家心目中嘅男神之外，當然係受子華嘅小丑造型影響喇。而自殺突擊隊的召集人阿曼達·華勒（Amanda Waller），網民就覺得應該由肥媽飾演，兩人除膚色不同，遠睇其實的確有幾分相似。至於客串嘅蝙蝠俠（Batman），相信唔使我講你都估到，香港人心目中只有一個蝙蝠俠，就係之前晚晚都開直播嘅黎明，明蝠俠嘅形象深入民心，相信大家都唔會忘記。
《自殺特攻：超能暴隊》中最受歡迎嘅角色小丑女（Harley Quinn），網民就「各花有各眼」，有人提議顏卓靈，亦有人提議林嘉欣、陳法拉。至於死亡射手（Deadshot）、迴旋鏢隊長（Captain Boomerang）、殺手鱷（Killer Croc）、燄魔（El Diablo）和卡塔娜（Katana）等人，網民嘅提議都好分散，唔知你又有無港版《自殺特攻》嘅心水演員呢？
記者﹕盧逸文
