現在才寫百富環球（327）事件，雖可能是遲了點，但還是想寫一筆。因失控無理指罵看淡分析員丟職的前財務總監李書沸，原來當日是寫了兩個版本道歉短訊，重寫全因為首個短訊「道歉含量」不足，但始終也改變不了事件的結果。
基金朋友說：「其實你哋睇到嘅出街版本，唔係原版，原版短好多，同埋更加無道歉意圖，雖則最後出街版本，查實都唔係好feel到同人道歉嘅感覺，因為佢喺個所謂嘅道歉短訊度，都仍然只係不停曲線咁話人哋唔夠準確同客觀，仲用咗一半字數，解釋自己幾咁勤力。」
連道歉也有「最終修訂版」？朋友笑謂，這當然不是他本人意思。他說：「咁就要講番點解會有第一個道歉短訊，第一個道歉短訊首先係喺基金經理通訊群組度出現，明顯係被迫出嘅，因當日群組內群情洶湧，差唔多講到要罷買百富股份，當事人咪焗住道歉囉。」
友人續說：「唔出猶自可，居然出個完全無歉意嘅短訊，群組反彈更大，有人覺得若果再係咁落去都唔係辦法，所以惟有死死地氣再出個短訊補鑊，雖然文內歉意唔強，但都叫加多咗兩錢肉緊㗎啦。」
想不到體育界出了個孫楊，財金界也出了個李書沸。
密西比