9月3日為新馬季開鑼日，究竟有邊啲倉值得馬迷注意呢？在2003年開倉後，方嘉柏例必榜上有名，皆因他從練13季以來都在開鑼日有馬上名，當中10季在首日賽事旗開得勝，秉承了父親方祿麟的急先鋒本色。而且，方廐往往在季初連珠炮發，前季及上季都係開季連贏五日，故此季初幾次賽事的方廐馬信得過。
其實方嘉柏季初搶攻有兩大特色，第一係喜用年長馬匹作先鋒，對上兩季9月份贏16W，逾半數的9W由六歲或以上馬包辦，上季首兩戰便憑兩匹六歲馬「豪逸」及「光速銀桂」建功，始終年長馬經驗較佳，狀態亦容易操起。
另一特色係專搏贏開嘅馬，前季「乖乖寶貝」及「執到寶」跨季連捷，上季亦有「豪逸」取得跨季孖寶，故此幾匹在上季最後一仗勝出之方廐馬，包括「文藝復興」、「川河寶駒」、「索咖啡」、「傾心星」及「罕曾見」在新季初有優先留意必要。