上市架構改革諮詢辣着唔少上市公司、投行、經紀，最新消息係，有人擺定龍門陣搞論壇，邀請埋證監會、港交所（388）代表參與，實行請君入甕！
話說首先發炮反對諮詢嘅上市公司商會，主席「紅籌之父」梁伯韜、副主席「創業板之父」羅嘉瑞下月7號會舉辦論壇，邀請唔同意見嘅團體，包括商會會員、其他上市公司等等，仲有早前表態傾向不反對諮詢嘅證券業協會主席繆英源，希望多啲人一齊參與討論。
兩位元老級人馬藝高人膽大，叫埋證監會、交易所代表參加，實行三口六面對質，到時一定有好戲睇！
商會都有邀請三位競選緊立法會金融服務界議席嘅候選人，即係張華峰、徐聯安、詹劍崙。不過留意番，下月4號就係選舉日，假設三人都答應出席嘅話，到時就有兩人係「落選者」。不過又咁講，真係有心為業界發聲嘅話，又點會怕尷尬，唔會輸咗就潛水啩。