10年老臣赫特，見證曼城崛起，但衰在被人認為佢傳波唔掂，冇得留低。喺禮拜三場歐聯附次回合，由於曼城首回合贏咗5:0，所以領隊哥迪奧拿派副選上陣，包括盛傳被賣走嘅門將赫特。最後曼城靠戴爾夫入波小勝1:0，兩回合6:0淘汰布加勒斯特星隊晉級。
29歲嘅赫特今場戴上隊長臂章，今季首次打正選，喺球迷歡呼下入場。其實哥迪奧巴禾已抵達曼市，所以今場好可能係呢名10年忠臣嘅告別戰；喺禮拜四，曼城亦宣佈咗同巴禾簽約四年，據報畀咗巴塞隆拿1,700萬鎊（約1.7億港元）轉會費。球迷帶齊橫額同標語，希望球會唔好賣走赫特。而赫特今場冇失波，16次傳球全部成功，賽後被問點睇呢項數據時，佢笑話：「原來我咁勁㗎，咁豬都應該識飛啦！」嘲諷嗰啲話佢唔識傳波嘅人。佢仲話：「我嘅情況大家都明，而球會得到想要好耐嘅頂級領隊，但佢有佢自己嘅睇法。」
