特首明年選戰開始有少少眉目，「雙曾」打開口牌話有心選，689連任之心就路人皆見，今次城中富豪就學精咗，冇立亂表態話撐邊個，好似銀娛（027）主席呂志和，噚日主持完業績會，一聽到記者問佢支持邊位，即刻哈哈大笑一聲，問番轉頭「你有冇參選呀？你參選，我舉你呀」，呢啲咪高手囉！
呂志和開完玩笑，就苦口婆心咁叫大家唔好諗特首選舉嘅事，畀心機做嘢好過，「政界係最複雜、最麻煩」。佢話，最好唔講，一心一意搞好香港經濟，唔好有咁多雜音。
問佢點睇潛在候選人，呂志和話，個個都為香港出心出力，「不過整整吓，啲人慢慢大大吓，好似話佢歪咗，或者話佢正咗，我哋唔敢批評呀，真係」。歪咗、正咗即係點，呂志和冇舉例以說明之，大家慢慢參透吧。