參選新界西嘅何君堯近日被網民質疑虛報學歷，話佢喺個人網站稱1984年喺英國州瑪高等教育學院（現為安格里亞魯斯金大學）榮譽法律學士學位畢業，但網民話安格里亞魯斯金大學1992年先成立，英國州瑪高等教育學院合併前只係專上學院，質疑何當年所獲嘅學位唔係學士、而係專上教育文憑。
何君堯喺facebook直播反擊，批評香港好多「低層次政治」，專門「摷舊料」，「因為佢有心理上嘅缺憾，好鍾意搵人哋啲弱點嚟攻擊，但係佢唔會喺人哋好處裏面諗好嘅嘢，只不過會喺屎坑裏面，專諗埋晒啲屎橋」，反斥攻擊其學歷，係無必要亦浪費時間，強調自己LLB（法學學士學位）畢業，但始終冇說明學歷出處，「你唔好理我出處喺邊度，總之就唔係野雞，OK？」該區其他參選名單，請參閱本報立會選戰網站 http://hk.apple.nextmedia.com/legco2016/region 。