講開面子，四年一度嘅奧運亦都圓滿結束，搞奧運確實係燒錢嘅面子工程。八年前京奧，據報中國花逾400億美金（約3,102億港元），香港條三跑俾人話大花筒，原來搞一次京奧，就夠錢起兩條三跑。當然有錢就是任性，鬼叫早幾年中國水浸，只要夠豪夠誇就成。不過英國同巴西儍唔晒，之後兩屆奧運都算慳住搞，四年後嘅東京奧運呢？喺里約奧運閉幕禮最精采嘅，個人認為係東京奧運預告短片，集合全世界都認識嘅日本動漫電玩人物，連首相都cosplay馬里奧，大家可以想像到我哋嘅習大大會cosplay小熊維尼嗎？
日本用動漫彰顯國力，證明唔係小眾嘢，「三間」今季新一輪廣告都出街，宣傳皇馬都用動漫化拍攝手法，講加里夫巴利助攻畀賓施馬入波，連教練施丹都客串上鏡。不過另一個「三間」主要贊助球星占士洛迪古斯（J-Rod、圖）呢？竟然得入球擁抱慶祝鏡頭過吓鏡，同名氣及身價完全不成正比。
施丹寧用20歲阿辛斯奧
坦白講，J-Rod喺皇馬真係相當尷尬。今季聯賽首戰，皇馬已經有賓施馬、C朗同莫迪歷缺陣，J-Rod都爭唔贏正選。施丹寧願用20歲𡃁仔馬高阿辛斯奧，J-Rod直至77分鐘先後備入替，好彩都有啲表現，交出助攻畀巴利埋齋。雖然施丹口口聲聲話J-Rod喺隊中仲有前途，冇打算賣走佢，但以球隊4-3-3陣式，安排佢打中場，就嫌防守力不足，打左、右翼鋒，速度感又唔夠；佢喺哥倫比亞國家隊一個打晒，但皇馬冇咁多機會畀佢發揮，以佢嘅天份真係好可惜。如果C朗養傷，J-Rod都搶唔到穩定嘅出場機會，真係要考慮另謀出路。
文：牽牛