立法會選舉論壇，噚晚去到名單最少嘅九龍東選區，雖然名單少，不過同樣精采，仲示範乜嘢叫做一物治一物。
熱血公民黃洋達一開波就話泛民抄佢政綱，之後喺提問環節，佢點咗東九龍社區關注組陳澤滔嚟答佢問題，但係黃洋達只係不斷藉住問陳澤滔，知唔知佔領期間旺角發生乜事、金鐘發生乜事，等陳澤滔簡單答咗句唔知，佢又乘勢可以大鬧泛民，最出位嘅莫過於佢講完一大輪後，突然攞咗本《雨傘失敗錄》，似賣廣告多啲囉！
黃洋達發洩完後，輪到前綫譚香文嚟料。譚香文質問完建制派後轉向黃洋達開火，佢不停追問黃洋達，一時話要永續《基本法》、一時燒《基本法》，係咪人格分裂先？黃洋達都未開到聲，譚香文就好有先見之明，窒住黃洋達話黃洋達都答唔到，搞到黃洋達冇聲出。
果然，好佬怕爛佬，爛佬怕潑婦。該區其他參選名單，請參閱本報立會選戰網站 http://hk.apple.nextmedia.com/legco2016/region 。